Ang Kanilang Kwento
Nagkakilala sila sa Pisay - Bicol sa Goa, Camarines Sur noong taong 2006. Isang taon ang kanilang pagitan, mas matanda si Arvin, naging magkagrupo sila sa Acquaintance Party noong freshman si Madonna at doon nagsimula ang lahat. Nagustuhan ni Arvin ang simpleng kagandahan at kabaitan ni Madonna hanggang sa nauwi ang lahat sa pakikipag-usap sa telepono at pagpaparamdam ng paghanga mula highschool hanggang kolehiyo sa Unibersidad ng Pilipinas sa Diliman.
Noong pumayag si Madonna na magpaligaw, sila ay halos laging nagkikita at kumakain sa mga kiosks sa Vinzon’s Hall para sa pancit canton at tusok-tusok. Ang paghatid sa may Molave Dorm pakatapos ng pasok sa hapon ay isa din sa madalas nilang gawain. Madalas din silang naglalakad-lakad sa Academic Oval at nagkukwentuhan tungkol sa kanilang mga ginawa buong araw o di kaya'y tumatambay sa may Karilyon at Quezon City Memorial Circle na nakatingala at nakatingin sa mga tala, nangangarap at umaasa sa masayang kinabukasan kasama ang isa’t isa. Simple at payak ang kanilang pagmamahalan.
Makalipas ang sampung taon, noong ika-apat ng Disyembre taong 2022, nakamit na ang pinakaaasam na oo. Kasama ng basbas ng mga magulang at sa harap ng kanilang matatalik na mga kaibigan, naibigay na ang “bato”! Ngayon, masasaksihan niyo ang patuloy na pagsibol ng kanilang pagmamahalan.